ജീവിതത്തിൽ വിജയിക്കാൻ ക്ലാസ് മുറികളിൽ പഠിക്കുന്ന പാഠങ്ങൾ മാത്രം മതിയാകില്ലെന്ന് മുൻ വിദ്യാഭ്യാസമന്ത്രി സി.രവീന്ദ്രനാഥ് ; ശ്രദ്ധേയമായി 'തലശേരി താരങ്ങൾ' പരിപാടി

തലശ്ശേരി:  (www.thalasserynews.in)ജീവിതത്തിൽ വിജയിക്കാൻ ക്ലാസ് മുറികളിൽ പഠിക്കുന്ന പാഠങ്ങൾ മാത്രം മതിയാകില്ലെന്ന് മുൻ വിദ്യാഭ്യാസ മന്ത്രി പ്രൊ. സി. രവീന്ദ്രനാഥ് അഭിപ്രായപ്പെട്ടു. സമൂഹത്തിലെ എല്ലാ സ്പന്ദനങ്ങളും അനുഭവങ്ങളും പഠനകാലത്ത് തന്നെ കുട്ടികളുടെ മനസ്സിൽ പതിയണമെന്നും അദ്ദേഹം പറഞ്ഞു.

തലശ്ശേരി മണ്ഡലത്തിൽ പഠനമികവ് പുലർത്തിയ വിദ്യാലയങ്ങളെയും വിദ്യാർത്ഥികളെയും ആദരിക്കുന്ന "വിജയോത്സവം 2026 – തലശ്ശേരി താരങ്ങൾ" പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

വിദ്യാഭ്യാസം പരീക്ഷകളിൽ ഉയർന്ന മാർക്ക് നേടാനുള്ള മാർഗം മാത്രമല്ല. സമൂഹത്തോടുള്ള ഉത്തരവാദിത്തവും മാനുഷിക മൂല്യങ്ങളും വളർത്തിയെടുക്കാനുള്ള പ്രക്രിയ കൂടിയാണെന്ന് അദ്ദേഹം ഓർമ്മിപ്പിച്ചു. വിദ്യാർത്ഥികൾ പുസ്തകങ്ങൾക്കപ്പുറം സമൂഹത്തിലെ മാറ്റങ്ങൾ, മനുഷ്യബന്ധങ്ങൾ, പരിസ്ഥിതി സംരക്ഷണം, ജനാധിപത്യ മൂല്യങ്ങൾ തുടങ്ങിയ വിഷയങ്ങളിലും അറിവ് നേടണമെന്നും അദ്ദേഹം കൂട്ടിച്ചേർത്തു.

അക്കാദമിക മികവിനൊപ്പം സാമൂഹിക പ്രതിബദ്ധതയുള്ള തലമുറയാണ് നാടിന്റെ ഭാവി നിർണയിക്കുന്നതെന്നും അദ്ദേഹം പറഞ്ഞു.കോടിയേരി ബാലകൃഷ്ണൻ സ്മാരക തലശ്ശേരി മുനിസിപ്പൽ ടൗൺഹാളിൽ നടന്ന ചടങ്ങിൽ കാരായി രാജൻ എം.എൽ.എ അധ്യക്ഷത വഹിച്ചു.

ജില്ലാ കലക്ടർ വിഷ്ണു രാജ് ഐ.എ.എസ്., സിനിമാ താരം മീനാക്ഷി എന്നിവർ മുഖ്യാതിഥികളായി. തലശ്ശേരി നഗരസഭ ചെയർമാൻ, വിവിധ ബ്ലോക്ക്-ഗ്രാമ പഞ്ചായത്ത് പ്രസിഡന്റുമാർ, ഉദ്യോഗസ്ഥർ, വിദ്യാഭ്യാസ പ്രവർത്തകർ തുടങ്ങിയവരും പങ്കെടുത്തു.

Also read: ചെറുവക്കര തറവാട് കുടുംബസംഗമം ; പാരമ്പര്യവും പുതുതലമുറയുടെ നേട്ടങ്ങളും ആഘോഷിച്ച് വേറിട്ട സംഗമം

എസ്.എസ്.എൽ.സി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർത്ഥികളെയും 100% വിജയം കൈവരിച്ച വിദ്യാലയങ്ങളെയും ചടങ്ങിൽ ആദരിച്ചു. മികവ് തെളിയിച്ചവർക്ക് ഉപഹാരങ്ങളും അനുമോദനപത്രങ്ങളും വിതരണം ചെയ്തു.

Content Highlight: C Ravindranath Inaugurates Thalassery Tharangal 2026: Education Beyond Classrooms

#Thalassery #C Ravindranath #Thalassery Tharangal #Kerala Education #Vijayosavam 2026 #SSLC Plus Two Toppers